رزگار عومەر 

دوای ساڵێك لەئازادكردنەوەی شاری مووسڵ لەدەستی داعش هونەرمەندی هۆلیۆد ئەنجلینا جولی وەكو باڵیۆزی نەتەوە یەكگرتووەكان سەردانی پاشماوەی وێرانی ئێستای شاری مووسڵیكرد، ئەم سەردانەی كردە وتارێك و لەڕۆژنامە جیهانییەكان بڵاویكردەوە، وتارەكەی ئەو چەند رەگەزێكی گرنگی تێدایە كە دەكرێ لەسەر بوەستین؛ لەڕووی گێڕانەوەی كۆستەكان لەدەمی قوربانییانەوە، لەڕووی تایبەتمەندی ئیستای رۆژئاوای شارەكە كە بۆنی تەرم ئاسمانی شارەكەی داگرتووە، ئەمە سەرەڕای ئەوەی بەبەردەوامی خەڵك خۆی وەكو كاری خۆبەخشی خەریكی دەرهێنانی تەرەمەكانیانن، هەروەها لەهەمووی گرنگتر ئەو رستەیەبوو كە جولی دەڵێ: یەك خێزان داوای یەك شتی لێ نەكردم، ئەوان پشتیان بەیارمەتییەكانی ئێمە نەبەستاوە!

رێكخراوی نەتەوە یەكگرتووەكان دەمێكە لەزۆرشوێنی جیهان بەپێودانگی پرەنسیپەكانی خۆشی بێت راستگۆیی لەدەست داوە، چونكە وەكو رێكخراوێكی جیهانی تەنیا لەدوای تراژیدیا پەیدا بێت و بەردەوام بوونیشی پەیوەستە بەبەردەوامبوونی تراژیدیاكان لەسەر ئەم گۆی زەمینە، جا لێرە زیاتر مەبەستمان ئەو كارەساتانەیە كە بەهۆی شەڕە دەستكردەكان دروستدەبن.

ساڵانێكی زۆرە چەندین نوسەر و ئەكتیڤیستی جیهانی لێكۆڵینەوە و وتاریان بڵاوكردۆتەوە لەسەر ئەوەی كە (كۆمەكی مرۆیی) بەمانا فراوانەكەی كە رێكخراوە جیهانییەكان بەكاری دەهێنن، خۆی لەخۆیدا بازرگانییەكی سەربەخۆیە لەكایەی گەورەی سیاسەتە جیهانییەكان بەتایبەتی كێبركێی زلهێزەكان و ئەو شەڕانەی راستەوخۆ دەیكەن یان بەوەكالەت بۆیان دەكەن. لەبەشێكی وتارەكە جولیدا هاتووە: هەستم بەشكستەكانی سیاسەتكرد، ئەم هەستكردنە وەكو كاردانەوەی هەر تاكێك كە بەئەزموونێكی دیاریكراو تێكەڵ بەنوێنەرایەتی دۆخێكی گەورەتر دەبێت لەو ئەزموون و روانگەیەی كە هەیەتی ناچاری دەكات رستەیەك یان دانپیانانێكی راستگۆ بدركێنێ لەسەر تراژیدیایەك كە گەورەترە لەدەستەواژەی گشتگیری (شكستی سیاسەت). تایبەتمەندی ئیشەكەی ئەو هونەرمەندە كە (دوور نییە زۆر راستگۆیانە دەیەوێ خزمەت بەدۆزێكی مرۆیی بكات)، زەمینەی ئەوەی تێدا نییە وێنە گەورەكە ببینێ، واتا سبەی لەشوێنی ئەو هونەرمەندە هەر نوسەر، گۆرانیبێژ، شاجوانێكیتری جیهانی دابنێین ناتوانێ لەو چوارچێوەیە زیاتر بدوێ، چونكە لەبنەڕەتدا ناگاتە ئاستی وەرگرتنی ئەو وەزیفەیە ئەگەر روانگە و جیهانبینی واوەتر بێ لەئاستی رەخنەیەكی گشتگیری وەكو (شكستی سیاسەت)، چونكە كێشەكە ئەوەیە كە ئەو بازرگانییە جیهانییە رێكخراوە جیهانییەكان چەتریان بۆ هەڵداوە لەڕووی رەخنەگرتنەوە سنوردارە و هیچ پێویستی بەوە نییە رەخنەی ریشەیی یا گەیاندنی حەقیقەتە ئەسڵەكە شوێنی بۆ بكرێتەوە. لەوتارەكەی ویدا هەست دەكەی هاووڵاتییانی ئەو شارە سەرەڕای ئەو دۆخە نامرۆییەی تێی كەوتوون هێشتا بەساردی هەڵوێست دەنوێنن بەرامبەر ئەو هونەرمەندە، دیارە نەك بەرامبەر بەكەسایەتی ئەو، بەڵكو بەرامبەر پیشەی باڵیۆزی نەتەوە یەكگرتووەكان، ئەم ساردییە لەوێرانەیەكی وادا كە هیچ خەیاڵێك ناتوانێ بەتەواوەتی بیگوازێتەوە، هەڵوێستێكە رەنگە لەڕووی بڵقی میدیایی یاقۆستنەوە سنوردارەكانی لایەنە سیاسییەكانی ناو عێراق گرنگییەكی وای نەبێت، بەڵام لەڕووی دیالیكتێكی هۆشیاری مانایەكی سیمبولی قوڵی هەیە كە ئەمساڵ دووەم جارە ئەم جۆرە لەهەڵوێست دووبارە بێتەوە، جاری پێشوش لەدوای داگیركردنی شاری عەفرین كە هێزەكانی روسیا كۆمەكیان بۆ ئاوارەكانی عەفرین هێنا كە لەدۆخێكی خراپدابوون كەچی خەڵكەكە هیچیان لێ وەرنەگرتن و هۆیهایان لێكردن.

وتارەكەی جولی دۆكیۆمێنتێكی گرنگە، لەئەنجامەكانی یارییە خوێناوییەكانی كێبڕكێی زلهێزەكان و هەرێمییەكان، دۆكیۆمێنتێكە لەسەر شكستی ئایندەیەك كە چارەنوسی بەشی گرنگی جوگرافیای دنیا و ژمارەی گرنگی دانیشتوانی رۆژهەڵاتی ناوەڕاست دەداتە دەستی كەلەیەكی پووچی ئیمپریالی كە بێجگە لەداتاكانی بەرژەوەند، هیچ حەقیقەتێكیتر بەتایبەتی مرۆڤبوون بەفەرمی نازانێت!

 بۆ بینیی سەردانەكەی جولی بۆ شاری موسڵ بەڤیدیۆ، كلیك لێرە بكە