ئاژانسێکی UNی تایبەت بە بەرهەمهێنانی ماددە هۆشبەرەکان لەکۆتاییەکانی ساڵی ٢٠١٧ ڕاپۆرتێکی لەژێر ناوی (ڕووپێوی ئەفیون لەئەفغانستان لەساڵی ٢٠١٧)دا بڵاوکردووەتەوەـ ئەم ڕاپۆرتە ئاماری گرنگ و ترسناکی تێدایە لەبارەی چاندنی ئەفیون لەئەفغانستان،ئاماژە بەوەکراوە؛ لەکۆی ئەو ئەفیونەی چانراوە دەکرێ لەنێوان ٥٠٠ بۆ ٩٠٠ تۆن ماددەی هیرۆین بەرهەم بهێنرێت!

تەشەنەی بەرهەمهێنانی ئەفیون گەشەی بە ئابووری (نایاسایی) داوە و بەهای ئەو بەرهەمە لەنێوان ٤.١ بۆ ٦.٦ ملیار دۆلار خەمڵێندراوە لەساڵی ٢٠١٧دا، لەئێستای ئەفغانستاندا لەدێهاتەکانی باکوور و ڕۆژئاوا سێ لەسەر چواری خەریکی چاندنی ئەفیونن، لە دێهاتەکانی ڕۆژهەڵات ٥٠%، لەدێهاتەکانی خواروش گەیشتووەتە لە٨٥% لەساڵی ٢٠١٧دا لەبواری چاندنی ڕووەکی حەشخاش و دوورینەوەی ئەفیون ٣٥٤ هەزار کەس وەکو فول تایم کاریان کردووە، ئەگەریش بەراوردێك بکرێت لەنێوان ڕادەی بەرهەمهێنان لەدووساڵی جیاوازدا دەبینین، لەساڵی ٢٠١٧دا ١٣١٢٠٠٠ دۆنم زەوی بەکارهاتووە بۆ چاندنی مۆرفین کە بەبەراورد بەساڵی ٢٠١٦ دەکا ٦٣% زیادیکردووە. قازانجی بزووتنەوەی تاڵیبان لەچاندنی ڕاستەوخۆ و بەرهەمهێنانی داتایەکی ڕوون نییە، بەڵام لەڕووی دانانی باج لەسەر چاندن و بەرهەمهێنانی ڕاپۆرتەکە ئاماژە بە١٨٤ ملیۆن دۆلار دەکات!

                         "دەرکەوتنەوەی تاڵیبان پێش ئەوەی ئەفیون بێت

                               شکستی پڕۆژەی ئیمپریالیزمە لەئەفغانستان"

یەکێك لەبەردەوامییەکانی تیرۆربوونی سەرچاوەی داهاتە، بەبێ بوونی داهات تیرۆر ناتوانێ ئەکتیڤ بێت، بوونی ئەو سەرچاوەی داهاتە هاوکاتە لەگەڵ سەرلەنوێ بوژانەوەی تاڵیبان لەڕووی سەربازی و فراوان بوونەوەی ناوچەکانی دەسەڵاتی لەئەفغانستان، هەروەها هاوکاتیشە لەگەڵ ئەو دەنگانەی کە لەناو دەسەڵات و پەرلەمانی ئێستای ئەفغانستان داوای ئەوە دەکەن کە وتووێژ بکرێت لەگەڵ تاڵیبان و شەرعیەتیان پێبدرێ و بەشداری بکەن لەحکوومەت و پەرلەماندا.

دەرکەوتنەوەی تاڵیبان پێش ئەوەی ئەفیون بێت، شکستی پڕۆژەی ئیمپریالیزمە لەئەفغانستان،کاتێك تاڵیبان دەرکرا لەچەند شارێکی سەرەکی، ئەوانەی هاتنە شوێنی لۆردەکانی شەڕی ناوخۆ بوون کە تەنیا وەلائیان گۆڕی لەئێران و پاکستان و سعودیە بۆ ئەمریکا. لەگەڵ دەست بەکاربوونی حکوومەتی دوای تاڵیبان چەشن و هاوشێوەی عێراق و هەرێم گەندەڵی و مشەخۆری لەسەر جەستەی داودەزگاکانی دەوڵەت بووە کولتووری جێگیرو تەنانەت هەشت ساڵێك بەر لە ئێستا سکانداڵی ئاودیوکردن و سپی کردنەوەی پارەو گواستنەوەی بۆ قەتەر مانگانە خۆی دەدا لە چل ملیۆن دۆلار!

هەموو ئەو نموونانەی سەرمایەداری بە ناوی هێنانی دیموکراسی جێگیری دەکات؛ بریتییە لە پاڵپشتی کردنی دواکەوتووترین و نامۆترین ئەو هێزو تاقمانەی کە نامۆن بە دابین کردنی ئایندەی باش و شایەن بە کۆمەڵگەو ئەو مرۆڤانەی لەو وڵاتانەی بە ناوی ئازادی داگیر دەکرێن، ئەفیونێك کە ترسناکترە لەو ئەفیونەی تاڵیبان پارەی پێ پەیدا دەکات بریتییە لەو وەهمەی کە عەوداڵ و سەرسام بی بەو دیموکراسییەی وەکو پڕۆژەی ئازادی هێزە ئیمپریالییەکان بەسەرتدا ساغ دەکەنەوە.

رزگار عومەر